الرئيسية » » العيب في مين ؟ في الشاب المتحرش ولا في البنت اللي بتلبس ضيق وعريان

العيب في مين ؟ في الشاب المتحرش ولا في البنت اللي بتلبس ضيق وعريان

تم النشر > يوم السبت، 15 أغسطس، 2015 | 4:56 م

العيب في مين ؟  في الشاب المتحرش ولا في البنت اللي بتلبس ضيق وعريان

الكاتب : صابر عزيز
العيب في مين ؟ 

 في الشاب المتحرش ولا في البنت اللي بتلبس ضيق وعريان ؟

الاجابة : العيب في الاتنين !
 ليه ؟ هقولكم :

اولاً العيب في الشاب اللي بيعاكس لانه مش بيفكر ان ممكن اخته او امه تكون في نفس الموقف وشاب تاني بيعاكسها وبيتحرش بيها ولو فكر كدة اكيد مش هيعاكس من الاساس لكن الواقع بيقول انه مش بيفكر بالمنطق ده وممكن لو حس بذنب هيبرر لنفسه ويقول البت دي اساسا شمال وتستاهل اني اتحرش بيها علشان تلم نفسها ومبرارت تاني كتيررررررر اوي .

ثانيا : العيب في البنت اللي بتلبس لبس غير لائق في مجتمع زي مجتمعنا مش معني كدة اني ضدد الحرية انها تلبس اللي يعجبها بس لازم تفكر قبل ما تختار هتلبس ايه في الكلام الجاي ده

1- احنا في مصر مش اوروبا يعني بالبلدي كدة مجتمع مختلف في كل حاجة من عادات وتقاليد وثقافات . يعني مينفعش تمشي بالشورت في منطقة شعبية او مثلا تلبس مايوه في مصيف فايد .. !

2- احنا في دولة مليانة بطالة و فقر ومرض وبلطجة وامية ومشاكل تاني كتير هتقولي وهي ذنبها ايه ؟ هقولك ذنبها انها عايشة في مصر ايوة ممكن تستعجب الكلام بس دي حقيقة لازم تعمل حساب للمشاكل دي اللي نتج عنها شباب تعبان متخلف مش عارف يفتح بيت ومش لاقي شغل ولو وجد شغل مرتبه مش هيفتح بيت ولا هيجيب شقة وممكن يقعد لسن ال35 سنة او اكتر ومش عارف يتجوز و تفكيره اصبح شهواني جدا وبيدور علي اي حاجة يعملها علشان يرضي الشهوة بتاعته .

3- لو بنت لبست جيبة ضيقة جدا او بدي مبين الفرق بتاع صدرها في مجتمع زي ده ايه الي هيحصل اكيد جزء من الشباب والرجالة هيشوفو ويتفرجو بس وجزء تاني هيعاكس بالكلام بس وجزء تالت هيتحرش وجزء رابع عنده استعداد يغتصب لو الفرصة متاحة قدامه وجزء خامس بيغتصب فعلا . وعلي فكرة البنت دي في نظر الخمس اجزاء من الشباب والرجالة انها شمال " ليه ؟ اقرا رقم 1 و2 تاني وهتعرف ليه .

4- ليه الناس في الغردقة وشرم بيلبسو اللي عايزينو ومحدش بيتحرش ولا بيتكلم غير قليل جدا ؟ 

اولاً علشان الاماكن دي بيكون فيها سيطرة للحكومة كبيرة فا الاغلب بيخاف وده لو اتحقق في كل مصر وكل واحد عاكس اتعاقب علي الغلطة دي ساعتها ممكن تلبس اللي هي عايزه .

ثانياً : في ناس كتير بتلبس كدة في الاماكن دي فا اصبح من الطبيعي انك تشوف واحدة لابسة مايوه او وماشية بشورت عادي جدا حتي لو سألت حد في اي منطقة شعبية عن شرم والغردقة والبنات بيلبسو ايه هتلاقيه تلقائي بيجاوب وكأنه شيء طبيعي مع انه نفس الشخص لو قولتله في منطقتك الشعبية دي لو واحدة لبست كدة هيكون عادي هيقولك لا .. وده ناتج عن عادات وتقاليد وثقافات .

الخلاصة : الموضوع مشكلة كبيرة جدا والبنت طالما عايشة في مصر لازم تعمل حساب للمشاكل دي علشان مش تتعرض لمشاكل كبيرة وتكون فريسة للوضع ده وتحاول تلبس ملابس متعرضهاش للخطر مش معني كدة ان اللي بتلبس لبس محتشم مش بتتعاكس بس اكيد في فرق كبير بين واحدة لابسة لبس غير لائق وواحدة لابسة لبس محتشم ولو الاتنين ماشين في مكان واحد اللي هتتعرض للخطر اكتر اللي لابسة لبس غير لائق بالنسبة للمجتمع ده فا ملابس البنت مش بتمنع الخطر او المعاكسة بس بتقلل الخطر اللي ممكن تتعرض ليه .

طبعاً العيوب في حاجات تاني كتير ممكن نتكلم عنها في مواضيع تاني زي العيب في المجتمع والعيب في الدولة .


لو عندك وجهة نظر او تعليق ممكن تكتبه من خلال صندوق التعليقات


0 التعليقات :

إرسال تعليق

ابحث في الموقع

الأكثر مشاهدة

-->