الرئيسية » , » نصائح هامة قبل ركوب التوك توك

نصائح هامة قبل ركوب التوك توك

تم النشر > يوم الخميس، 3 ديسمبر، 2015 | 8:03 ص

نصائح هامة قبل ركوب التوك توك ( التوكتوك )
التوك توك انتشر في الفترة الاخيرة بشكل كبير جدا في جميع المناطق واصبح من اهم وسائل المواصلات وخصوصا انه بيوصل لجميع الاماكن لصغر حجمه .




اولا : تعرف التوك توك :
يطلق عليه التوكتوك أو البجاج أو الركشة (بالهندية:हिन्दी) (جمع:تكاتك) هو مركبة نارية ذات ثلات عجلات، تستخدم غالبا كويسلة للانتقال بالاجرة. ينتشر التوك توك بكثرة في البلاد الآسيوية ولا سيما في البلاد العربية وخصوصا في مصر والسودان. يتسع التوك توك لراكبين بالمقعد الخلفي (أو ثلاثة محشورين بجانب بعض) بالإضافة الي السائق الذي يجلس في المقدمة.

ثانياً : سنعرض اهم النصائح قبل ركوب التوك توك 

 1- اسأل قبل ما تركب

لو رايح مكان معين وهتركب توكتوك واول مرة تروح المكان ده اسأل اي حد في المكان اللي انت فيه وقوله هو التوكتوك هياخد كام في المشوار ده .

2- اتفق مع سواق التوكتوك " التوك توك " على الاجرة

قبل ما تركب لازم تتفق علي الاجرة وهتقوله هتاخد كام في المشوار ده ولو عرض عليك سعر اعلى من اللي عرفته من الناس في المنطقة قوله لا واعرض عليه السعر اللي انت عرفته .. لو اتفقت معه تمام لو لا  وقف توكتوك تاني .
بنكرر تاني اتفق على الاجرة علشان لو وصلك وانت مش متفق ممكن يطلب اجرة غالية وساعتها يا اما هتدفع يا اما هتعمل مشكلة فا من الافضل تتفق .

3-  اسأل سواق التوك توك عن المكان اللي هتروحوه واتاكد انه عارف الطريق لو انت مش عارف الطريق

في اوقات بتركب مع سواق توك توك وتتفق على الاجرة وانتو وماشين تلاقي السواق تايه ويقولك فين المكان والشارع ..الخ وتلف لفة كبيرة جدا مع انه كان ممكن يوصل اقرب واسرع لو عارف المكان ولما توصل هتيجي تديلو الاجرة هيقولك احنا لافينا جامد وياريت تزودها شوية ...الخ فا اتاكد انه عارف الطريق قبل ما تركب .

4- اختار التوك توك اللي يعجبك

مش لازم تركب اول توك توك يقابلك خصوصا ان عدد التكاتك اصبح كبير جدا في كل منطقة فا لو لاقيت توكتوك مبهدل جدا مش لازم تركبه وخصوصا لو مشوارك بعيد شوية كدة كدة هتدفع نفس الاجرة فا اختار الافضل .

5- اختار السواق اللي يعجبك

نفس الموضوع في اختيار التوك توك بردو اختار السواق اللي يعجبك .. مش لازم تركب مع توكتوك بيسوقه طفل صغير جدا وفي الاغلب بيكون متهور .. ومش لازم تركب مع سواق راكب جنبه حد تاني علشان في الاغلب هيكونوا بيتكلموا في حورات مش تمام وهتلاقي السواق منسجم مع اللي راكب جنبه ومشغول ومش مركز في مشواره وبيجري بسرعة ولو اتكلمت معه هتلاقي الاتنين بيردو عليك مش اللي سايق التوك توك بس .
طبعا اختيار السواق ده مهم خصوصا لو معاك حد من الجنس الانثوي لكن لو وحدك ممكن متفرقش معاك ومشوار وهيعدي .

ثالثا : في حالات معينة من الافضل متركبش التوك توك

1 - السيدة الحامل

 لو واحدة حامل طبعا من الافضل متركبش التوك توك علشان ميحصلش كارثة حتى لو هتنبهي عليه يمشي بالراحة وبهدوء مش هتضمني ده لان اغلب سواقين التوك توك مش بيهتموا بالقصص دي وهيمشي بسرعة الا لو انتي تعرفي سواق التوك توك شخصياً

2- لو المشوار بعيد جدا

لو المشوار بعيد جدا الافضل تركب اي حاجة توصلك غير التوك توك ويفضل التاكسي او الميكروباص حتي لو سعره اغلى لان التوك توك مخصص للاماكن القريبة ومش الاماكن البعيدة وكمان مكشوف وهتتعرض لهوا واتربة طول الطريق وممكن كمان يعطل بيك وانت رايح المشوار بتاعك فا الافضل تركب اي وسيلة مواصلات اخرى لو مشوارك بعيد .

3- واحد عامل عملية جراحية او مكسور

لو حد عامل عملية او مكسور او اي حاجة زي كدة من الافضل ميركبش توك توك نهائيا ويركب تاكس هيكون افضل بكتير علشان الجرح او الكسر ميتعرضش لمشكلة .


دي كانت اهم النصائح قبل ركوب التوكتوك او " التوك توك " ولو عندك نصيحة او تعليق ممكن تكتبها في صندوق التعليقات



0 التعليقات :

إرسال تعليق

ابحث في الموقع

الأكثر مشاهدة

-->