الرئيسية » , » فوز دونالد ترامب مش هيفرق معاك في حاجة والدليل من سبقه في رئاسة امريكا

فوز دونالد ترامب مش هيفرق معاك في حاجة والدليل من سبقه في رئاسة امريكا

تم النشر > يوم الجمعة، 11 نوفمبر، 2016 | 3:55 م

فوز دونالد ترامب مش هيفرق معاك في حاجة والدليل من سبقه في رئاسة الولايات المتحدة الامريكية

مش فارق معايا فوز دونالد ترامب ...ومشغلتش بالي بيه ...عشان فاكر ساعه انتخابات 2000 لما جورج بوش كسب ..كننا شاغلين بالنا بالموضوع وقولنا ساعتها علي جورج بوش انه كويس ومعتدل والحياه هتبقي الطف معاه ...وادينا شوفنا اللي حصل في العراق

ساعه الاخ اوباما ... قعدنا نقول ده باراك حسين اوباما ...ومسلم بس مخبي ..وامه مابتقومش من ع المصليه ... وادينا شايفين دور امريكا في دعم الانظمه الاجراميه والقمعيه واللي بتمول الحكام اللي بيقتلوا شعوبهم مادام ده بيتماشي مع مصلحتهم

كده كده رئيس امريكا بينفذ اجنده سياسيه خاصه بالبلد ...مش ممشيها علي هواه وشغل العيل الطريه اللي فاكرينها بلد ابوهم اللي بيحصل عندنا في الوطن العربي ده وخلينا نقول وطن عربي عشان مانتمسكش وكده 

لو هيلاري كلينتون كانت كسبت ماكنتش هتفرق كتير عن دونالد ...كده كده دول ترس في مكنه كبيره ...هما دورهم فيها محدود وملوش لازمه تقريبا والموضوع اكبر منهم كأشخاص

التخوف الاول هو ان امريكا تكون بتصدرلنا الاخ ترامب بعنصريته الواضحه والمعلنه ده ممكن يكون وراه نيه لحاجه عاوزه تعملها وحروب بقي وحاجات من اللي قلبك يحبها ويبقي ترامب الواجهه ليها ..اللي هو والله هو اللي عمل كده هو غسان مطر الوحش العنصري لكن احنا امريكا حلوه وزي الفل وطيبه زي كريمه مختار بالظبط


المشكله التانيه ودي الاهم ...هي ان عدد المصوتين الكبير اللي خلي دونالد ترامب يكسب ده بيديك مؤشر عن الشعب الامريكي وفكره ...يديك مؤشر عن دين الانسانيه اللي بيدينوا بيها وانهم مش ضد العنصريه اللي بتخدم مصالحهم .... وان اكيد عندهم لميس الحديد واحمد موسي زينا بس علي مستوي احترافي حبتين ... وان لما المصالح بتتصالح انسي يابن عمي شعارات الديموقراطيه والانسانيه والمهلبيه والطعميه بتاعتنا دي هنا ...
.
اعتقد ترامب هيقعد 4 سنين بس هيبقيوا مليانين بالدمار والهلاك ...واعتقد ان ال 4 سنين دول هيبقي فيهم حاجات كتير هتحصل واوضاعنا هتسوء بشكل كبير عشان دائما احنا الحلقه الاضعف اللي بتتأثر بأي حاجه .

اربع سنين من مزيد من القتل والدم والارهاب الامريكي المغطي بقشره دونالد ترامب الشرير
وفي الاول والاخر احنا لو حد عطس في اي بقاع العالم بنتأثر واقتصادنا بينهار وبيقفلولنا محطه مترو السادات .... ولو ع الدم فالحمد لله ولاد بلدنا مش مقصرين معانا في حاجه تصفيه واعتقال واعدامات ومش حارمينا من حاجه ....فمش هيفرق معانا اوي مين كسب ومين خسر يا ماااصرييييييييييين بصوت استاذ يوسف شعبان

عرفتوا ليه بقي الديموقراطيه طلعت فعلا حرام ؟ ...ع العموم يعني مش عاوزين نسبق الاحداث ...ولا اقولكم........ ماتيجو نشوووف ؟

الكاتب : سلامة

المقال يعبر عن رأي الكاتب ولايعبر بالضرورة عن رأي الموقع

0 التعليقات :

إرسال تعليق

ابحث في الموقع

الأكثر مشاهدة

-->