الرئيسية » , » بالتفاصيل ماذا يحدث في رحلة الهجرة الغير شرعية - حوار مع مهاجر غير شرعي وصل اوروبا عن طريق البحر

بالتفاصيل ماذا يحدث في رحلة الهجرة الغير شرعية - حوار مع مهاجر غير شرعي وصل اوروبا عن طريق البحر

تم النشر > يوم الاثنين، 24 أكتوبر، 2016 | 1:22 م



1- الفكره جتلك منين  ؟

ناس قرايبي سافروا واعز اصحابي سافروا فا بعد كده طبعآ كلنآ بنسمع علي أوروبا أنها جميلة وحلوة وعيشه نضيفه وكفايه انك هتروح عالم تاني.

 تفكير بقا وخيال بنفكر في حياة افضل فا هنا بدأت  في دماغي فكرة السفر قولت لابويا انا هسافر اتكلمنا مع بعض زي هزار بالنسباله وأنا في دماغي اني هسافر بجد .
 بس عدت الأيام برضوا ناس كتير بتسافر وبتحكي على السفر برضوا انه عذاب بس انا مش في دماغي انها عذاب وانا مش فارق معايا المهم اني اسافر . 
مع مرور الأيام كل شويه الناس اللي بيسافروا بيزيدوا وقرارت اني اسافر بس مش عارف امتى .

2 - اخدت القرار ازاي ؟

عدت سنه والتانيه وخلاص بقا قررت اني اسافر بس متردد انا عارف ان الناس بتغرق وناس حكتلي كتير منها قالي كلام حلو ومنهم قالي كلام وحش .

طبعآ اهلي كانوا رافضين تماماً لدرجة اني خلاص كنت ماشي ولبست هدومي وامي شافتني وعرفت اني مسافر وفضلت تعيط وعملت نفسها تعبانه عشان مسافرش و لقيت نفسي مش هينفع اطلع قدامهم واقولهم انا مسافر فا قولتلهم خلاص انا مش مسافر.
فات أسبوع وخلاص كنت في اجازة المدرسة  واحد قريبي جمع  شغل وسفرت القاهرة في منطقة عزبة النخل .

3- ايه هي الاسباب اللي دفعتك للسفر ؟


كنت شغال في مصر طالع ميتن اهلي في الشغل 1000جنيه في الشهر 12ساعه متواصله في اليوم وكنت تعبان جدآ وصاحب الشغل بيعاملني وحش كرهت نفسي من الدنيا فا قررت اسافر .


4- وصلت للمندوب ازاي ؟

كنت في مصر وكان معايا رقم الراجل الي هيسفرني الرقم هتجيبه من اي حد سافر ورجع او من واحد ابنه سافر وفي اكتر من طريقه عشان توصل لرقم المندوب الموضوع مش صعب هتجيب رقمه من اي حد سافر أو حد ابنه سافر فا جبت الرقم .

5- ايه الي تم بينك وبين المندوب ؟

الي تم كلمتوا قلتله انا اسمي فلان عايز أسفر إيطاليا قالي ماشي لما تكون في مركب طالعه هكلمك قلتله ماشي تاني يوم اتصل بيا تعالى في مركب طالع بعد 3 ايام انا كنت متردد مش عارف ارد عليه المهم اتصل بيا اكتر من مره تعالى المركب كبيرة وعالية وانا سفرت صحابك فلان وفلان وقريبك وقعد يرسم ويذن عليا وناس اصحابي كانو مكلمينه برضو من البلد المهم هما سافرو من البلد " اسيوط لـ اسكندريه وانا مشيت من مصر عزبة النخل لـ اسكندريه .

6- اشرح مواصلاتك من مكانك الي اسكندرية ؟

هو كلمني قالي اركب من مكانك الي حته اسمها شارع 45 في اسكندريه وهبعتلك ناس تاخدك وصلت شارع 45 وبرضوا اصحابي وناس تاني جم المكان طبعاً هنا المندوب اللي من البلد الي مطلعنا اختفى وقفل تليفونه .

7- وصلت المكان ازاي ؟

 جت  ناس خدونا كانوا 3 شباب واحنا كنا 7 من البلد من المكان ده راكبونا عربيه ميكروباص وروحنا شقه قريبة من البحر .

8- عددالناس اللي سافروا معاك اسكندرية ؟

كنا 7 من سن 15 سنه لـ ٢٧ سنه

9- أماكن التخزين الي روحتها ؟

مكان واحد بس هي شقه قريبه من البحر

10- ايه الي تم معاكم في التخزين؟ 

روحنا الشقه لقينا 7 تاني بقينا 14 واحد في شقه غرفتين وصاله قالولنا اقعدو هنا محدش يعمل صوت ولا يتكلم في حكايه السفر وتليفوناتكم تقفلوها عشان محدش يلاحظ والي عايز ينزل يجيب حاجة ينزل واحد يشتري للكل قعدنا 5 أيام علي الحال ده زهقنا هدومنا عفنت المهم كل يوم يقولوا هتركبوا النهارده باليل وبعدين يلغوا بحجة البحر هايج .
كل يوم يقولوا كده وكانوا يركبونا عربيات ميكروباص وقالولنا هتركبوا وبعد كده يرجعونا الشقه تاني يقولوا في حكومه او البحر هايج 5 ايام علي كده في التخزين كان في واحد منهم اسمه "عسليه" بيشخر ويشتم فينا شتيمه وحشه الخ .
ومش عارفين ننام كل تلاته نايمين على بعض مفيش مكان واللي قلقان وكل واحد في حاله .

11- أثناء الركوب ايه اللي حصل وكام مركب ركبتها ؟

خدونا بعربيه ميكروباص احنا الـ 14 ولاقينا اكتر من عربية ميكروباص برضوا تبعنا جايبن ورانا في كل عربيه فيها 15 من جميع الجنسيات سوري مصري إفريقي وخدونا في حته ضلمه شبه الغابة ونزلونا كل عربيه فيها 3 مسلحين وشكلهم هاربين من سجون نزلونا في الغابة وركبونا اوتوبيس كبير وراكبوا في الاتوبيس حوالي 100 واحد وقفلوا ستاير الاتوبيس.

 كان معانا افارقه وسوريين وحريم وأطفال واسر  كاملة والأطفال من سن شهرين لفوق في أطفال كانت بترضع في الاتوبيس فضل ماشي بينا من9 الي 1 بالليل في صحراء مش عرفين احنا ريحين فين ولا هنركب منين.

المهم نزلنا في المكان المتحدد بيسموها النزلة وسمعنا صوت المياه اللي هو الشاطئ وقعدنا نجري والناس المسلحين دول يشتموا في الناس وبيقولوا اجروا بسرعه .
 وكل ما نمشي حته في الغابة يطلع منها حوالي ١٠٠ شخص من جميع الجنسيات فضلنا نجري يمكن نص ساعه.
واللي كان لابس لبس ابيض يضربوا ويشتموه و واحد صحبي تليفونه نور ضربه ضرب جامد عشان محدش يشوفنا في الضلمه .
اللي يصعب عليك الاطفال والحريم اللي من صراخ الاطفال لحد موصلنا علي الشاطئ .

الناس اللي راكبونا كانوا جايبين الزورق اللي بيبدل ويركبو فيه 30 واحد وهو اخرو 10 او 15 بالكتير انا عن نفسي جيت اركب مشوفتش الزورق نطيت غلط واحد شدني من أيدى بسرعه ولقحني في الزورق قبل ما الزورق يمشي .

واتحرك بينا زي ساعه وروحنا مركب كبيرة شويه والمركب دي مشيت بينا يوم وصلتنا للكبيره بس ولا كبير ولا حاجه  أكبر من اللي قبلها بمترين كله شاف المركب الكبيرة وقعدوا يلطموا  قولنا هي دي اللي هتوصلنا .

وصلنا المركب للكبيره وهما بينقلونا من دي لدي أصعب اللحظات كان بيقربوا المركبتين على بعض ويربطوهم فا طبعآ المركبتين واقفين من الموجة وحده تعلا والتانيه تنزل ولمه يتساووا جنب ببعض تنط من مركب للتانيه .

 وبعد مانقلونا كلنا المركب الكبيره اللي نزلوا حوالي200 واحد في التلاجه بطن المركب .

وطبعا الناس بترجع واللي بيعيط واللي اغمى عليه  وطقم المركب كان بيشتموا وقلة ادب واللي معه فلوس مصريه بيخدوها منه

12- عددكم كان كام في المركب ؟

 كنا علي المركب 400 يا دوب كانت ماشيه بينا وكانت جايه ورانا مركب برضوا تبعنا فيها 200 شخص المهم بعد ما عدينا ليبيا موجه كان عالية جدآ واللي بيستشهد واللي خايف واللي بيعيط واللي بيندم وعايز يرجع كله في حاله في توهان مش حاسس بنفسه .

13 : ايه اللي تم بعد كدة في الرحلة ؟

المركب كانت بتعبي مياه من الأمواج المهم اول ما دخلنا حدود إيطاليا الناس اللي كانت في المركب اللي ورانا جابوهم معانا في مركبنا اللي احنا فيها والتانيه رجعت.. كده بقينا 600 على المركب واللهي تاني المركب كانت بتقطق خلاص هتغرق .

 بتنزل وتتطلع والناس تعيط وتقول يا رب المهم استحملنا وقعدنا يوم ونص فيها من غير اكل ولا ميه بعد كده السوريبن اتخانقوا مع طقم المركب وقلولهم بلغوا الصليب الأحمر ينقذنا عشان خلاص المركب جابت آخرها وكل شويه يقولو 6 ساعات ونوصل الشاطئ ومفيش شاطئ يعم خالص .

المهم بلغوا بعد ساعتين جت طياره فوقينا تمشي وتيجي علينا واحنا نشورلها بيدينا عشان تيجي تنقذنا المهم كمان 4 ساعات لقينا مركب حربيه كبيره جدآ ولنشات حربيه وغواصين ودكاترة وصلوا و فضلوا يتكلمو بالانجليزي مع السوريين عشان كان فيهم ناس بيعرفوا انجليزي. المهم فضلوا يرمولنا عاومات على المركب بتعتنا عشان نلبسها عشان المركب متغراقش المهم قعدو اكتر من سعتين ينقلوا فينا ونقلونا وتمام وخدنا مياه نشرب واكل ودكتور يكشف علينا وتصوير  وتفيش بصمات .

14 : طب عملوا ايه في المركب ؟

المركب اللي جينا فيها من مصر فجروها ضربوها خلوها غطست في المياه وبعدين وصلونا في حته اسمها باري نزلونا من المركب  وعملنا فيش تاني وراكبونا أتوبيسات وروحنا حته كلها خيم كل خيمة يناموا فيها 8 . 
جابولنا هدوم واستحمينا واللي كلم اهله وجابولنا مترجمين قالوننا بكرة الصبح الصغيرين هيروحوا المدرسه والكبار هيترحلوا.

15- هل كان عليكم حراسة في المكان اللي فيه الخيم ؟

المكان ده كان محوط بسلك شوكي قعدنا بليل ولقينا كله بيهرب من السلك ده والحكومه الإيطالية واقفه ولا في بالها وشايفينا بنهرب عادي جدآ  .

هربت انا واتنين اصحابي واحد كبير وواحد صغير قعدنا نجري في الزرع وجبل كله شجر لحد ما وصلنا طريق صحراوي ووقفنا واحد بتاكسي ايطالي طبعآ مش عارفين نتكلم ايطالي .

كان معانا التليفونات اتصلنا بـ واحد قريبي في ايطاليا كلم الراجل سواق التاكس عشان يوصلنا المحطة وفعلا وصلنا لمحطه القطر
وعشان نروح ميلانو استنينا القطر وركبنا .

واحد صاحبي معه فلوس يورو قطع تذكرة وانا وصاحبي التاني ركبنا من غير تذكره جي الكومسري طبعاً واحنا مش معانا تذاكر انا وصاحبي خدنا ونزلنا للشرطه في المحطه اللي بعديها.
 الشرطه خدتتنا فتشتنا وفيشونا تاني وقلنالهم عندنا 17 سنه وقعدنا شويه في القسم وبعد شويه جه واحد  بـ عربيه خدنا المدرسه .

طبعاً المدرسة حاجة حلوة  هدووم واكل وعيشا تاني فضلنا على الحال ده شهر ونص وطلبوا مننا شهادات الميلاد عشان يعملونا الاقامه طبعآ احنا سننا معدي18 سنة في الأصل فا كان لازم اهرب .
انا بخرج من المدرس اتفسح بره وارجع تاني المدرسه لحد مالاقيت واحد لبناني خليت قريبي بعت عليه فلوس وخرجنا انا وصاحبي وروحنا عند القطر ومشينا ميلانو وكان عمي مستنينا في محطة ميلانو. وحاليا شغال في مطعم في ميلانو .


 صور لمنطقة الدومو كاتدرائية ميلانو بـ ايطاليا

0 التعليقات :

إرسال تعليق

ابحث في الموقع

الأكثر مشاهدة

-->